Love Marriage : ప్రేమ అంటే ఇది.. దివ్యాంగురాలిని పెళ్ళాడి ఆశ్చ‌ర్య‌ప‌ర‌చిన యువ‌కుడు

Love Marriage : భద్రాద్రి కొత్తగూడెం జిల్లాకు చెందిన ఓ యువకుడు ప్రేమకు నిజమైన అర్థాన్ని చూపించాడు. ఈ ఘటన గురించి తెలుసుకుంటే వరల్డ్ గ్రేటెస్ట్ లవర్‌గా అతడిని కీర్తించకమానరు. వివ‌రాల‌లోకి వెళితే ఇల్లెందుకు చెందిన మూతి వసంతరావు(22), మణుగూరుకు చెందిన దివ్యాంగురాలు నరసమ్మ (21)ల ప్రేమకథ అందరికి ఆద‌ర్శంగా నిలిచింది.

young man getting love marriage with handicapped woman
young man getting love marriage with handicapped woman

డ్రైవర్‌గా పనిచేసే వసంతరావు ఏడాది క్రితం ఓ వివాహ వేడుకలో నరసమ్మను చూశాడు. మాటలు కలిసి ఇద్దరి మనసులు అల్లుకున్నాయి. దీంతో వివాహ బంధంతో ఒకటి కావాలనుకున్నారు. అయితే నరసమ్మ దివ్యాంగురాలు. కాళ్లలో సమస్యలతో నడవలేదు.

నేలపై కూర్చుని చేతుల ఆధారంగా ముందుకు సాగుతుంటుంది. తల్లిదండ్రులు, సోదరుణ్ని కోల్పోవడంతో తన వదిన వద్ద ఉంటూ డిగ్రీ వరకు చదువుకుని టైలర్‌గా ఉపాధి పొందుతోంది. దీంతో ఆ పిల్లను పెళ్లి చేసుకుని ఏం సుఖపడతావ్ అంటూ పెద్దలు అడ్డుచెప్పారు. అయితే తనది నిజమైన ప్రేమని, కలిసి బ్రతకడానికి మనసులు ముఖ్యంగానీ, శరీరాలు కాదని వసంతరావు కుటుంబసభ్యులకు నచ్చజెప్పే ప్రయత్నం చేసినా వారు వినిపించుకోలేదు.

మరోవైపు ఈ పెళ్లికి నరసమ్మ బంధువులు సైతం అంగీకరించలేదు. దీంతో ఈ ప్రేమజంట జిల్లా విభిన్న ప్రతిభావంతుల సంఘం, దివ్యాంగ ఉద్యోగుల సంఘాన్ని ఆశ్రయించింది. స్పందించిన నాయకులు ఆదివారం కొత్తగూడెం రుద్రంపూర్‌లోని దేవాలయంలో వీరికి ఆదర్శ వివాహం జరిపించారు.

వివాహ వేదిక వద్దకు వరుడు వధువును ఎత్తుకుని వస్తున్న సందర్భంలో అతిథులు కరతాళ ధ్వనులతో స్వాగతం పలికారు. దివ్యాంగురాలైన నరసమ్మకు కొత్త జీవితాన్నిచ్చిన వసంతరావును పలువురు అభినందించారు.