GOA CM: ఇద్ద‌రు బాలిక‌ల‌పై అత్యాచారం.. వారికి బీచ్‌లో ఏం ప‌ని అంటూ సీఎం కామెంట్స్

GOA CM: గోవాలోని ఒక బీచ్‌లో ఇద్దరు మైనర్ బాలికలపై జరిగిన సామూహిక అత్యాచారం జ‌రిగిన సంగ‌తి తెలిసిందే. గోవా రాజధాని పనాజీకి 30 కిలోమీటర్ల దూరంలోని కోల్వా బీచ్‌కు ఇద్దరు మగపిల్లలతో కలసి ఇద్దరు మైనర్ బాలికలు వెళ్లగా తాము పోలీసులమంటూ నలుగురు వ్యక్తులు వారి వద్దకు వెళ్లి ఆ ఇద్దరు మగపిల్లలను చితకబాది ఇద్దరు మైనర్ బాలికలపై సామూహిక అత్యాచారానికి పాల్పడినట్లు ఆరోపణలు వచ్చాయి.

న‌లుగురిలో వ్య‌వ‌సాయ శాఖ‌లో డ్రైవ‌ర్‌గా పని చేస్తున్న ప్ర‌భుత్వ‌వ ఉద్యోగి ఒక‌డు ఉన్నాడు. ఆ ఉద్యోగిని సర్వీను నుంచి డిస్మిస్ చేసే ప్రక్రియ సాగుతుండ‌గా, న‌లుగురు నిందితుల‌ని పోలీసులు అరెస్ట్ చేసి విచారిస్తున్నారు. అయితే దీనిపై గోవాలో పెద్ద ఎత్తున ర‌చ్చ న‌డుస్తుంది. బాధితులకు న్యాయం చేయాలని, నిందితులను కఠినంగా శిక్షించాలని మహిళా, ప్రజా సంఘాలు ఆందోళన చేస్తుండ‌గా, విప‌క్షాలు ముప్పేట దాడి చేస్తున్నాయి.

ఈ అంశంపై అసెంబ్లీలో చర్చ చేపట్టాలని విపక్షాలు డిమాండ్ చేస్తున్న నేప‌థ్యంలో గోవా సీఎం ప్ర‌మోద్ సావంత్ సంచ‌ల‌న వ్యాఖ్య‌లు చేశారు. అసెంబ్లీలో తాజాగా మాట్లాడిన ఆయ‌న అర్ధ‌రాత్రి ఆడ‌పిల్ల‌ల‌ను బ‌య‌ట‌కు ఎందుకు పంపాలి, బీచ్‌లో వారికి ఆ స‌మ‌యంలో ఏం ప‌ని? అని ప్రశ్నించారు. అర్ధరాత్రి పిల్లలు బయటకు వెళ్లారంటే.. తల్లిదండ్రులకు బాధ్యత లేదా? వారి బాధ్యతారాహిత్యంపై ప్రభుత్వం, పోలీసులను తప్పుబట్టడం సరికాదని అని సీఎం సావంత్‌ తీవ్రంగా స్పందించారు.

ముఖ్యమంత్రి చేసిన వ్యాఖ్య‌లు ఆడ‌వారిని కించ‌ప‌రిచేలా ఉన్నాయని ప్ర‌తిప‌క్షాలు మండిప‌డుతున్నాయి. దీనిపై వెంట‌నే క్ష‌మాప‌ణ‌లు చెప్పాల‌ని డిమాండ్ చేస్తున్నాయి. మ‌రి దీనిపై సీఎం ఏమైన స్పందిస్తారా అనేది తెలియాల్సి ఉంది. కాగా, జూలై 24వ తేదీన రాజధాని పనాజీకి 30 కిలో మీటర్ల దూరంలోని కోల్వా బీచ్‌లో పార్టీ జ‌ర‌గ‌గా, దీనికి 10 మంది టీనేజర్లు హాజరయ్యారు. పార్టీ ముగిశాక వారిలో 6 మంది ఇళ్లకు వెళ్లిపోగా.. ఇద్దరు బాలురు, ఇద్దరు బాలికలు రాత్రంగా బీచ్‌లోనే ఉండిపోయారు. ఆ స‌మ‌యంలో దారుణం జ‌రిగింది.